Je la 11a de septembro 2001 la mondo transformighis. Per nekomprenebla teroro, al ni okazis io horora.
Tiu estas horo de FUNEBRO, sed ankau de PRIPENSADO.
Solene mi deklaras hodiau antau la usona popolo kaj antau la tuta mondo,
ke ni usonanoj ne faros ion ech nur proksimume tiel teruran kontrau iu lando de la tero.

Ekzistas homoj, kiuj malamas nin tiom, ke ili etendas teroron super ni kaj sendistinge mortigas homojn.
Sed ni ne permesas, ke tiaj homoj diktu al ni la leghojn de nia propra agado.
Ilin blindigas malamo. Sed ni ne transdonos nin al malamo. Ni ne respondos teroron per teroro.
Jen iuj deklaris al ni militon, sed ni ne permesas ke iu trudu al ni militon.

Tiuj atencoj estis ATAKO KONTRAU CHIUJ VALOROJ DE CIVILIZACIO.
Sed ni ne permesas, ke iu rabu de ni nian civilizon.
Ni donos respondon, rezolutan, inteligentan, prudentan respondon, sed respondon civilizitan.
Kiel ni povus esti fideblaj en nia lukto kontrau malrespekto al la homoj, se ni mem aplikus rimedojn malrespektajn al la homoj?
Ni luktos kontrau terorismo, sed bazante nin ne sur vengho sed sur juro.

Antau chio, ni ne kauzos novajn TIMOJN EN LA ARABA MONDO pri krucmilito.
Malnovajn malamiko-klishojn ni lasas post ni.
La novan jarmilon neniel inauguros nova milito, sed granda, mondvasta alianco kaj ofensivo kontrau teroro kaj perforto.
Por tio, ni turnos nin, komune kun chiuj shtatoj apogantaj nin sur tiu vojo,
kontrau mono-lavado, korupto, organizita krimo kaj mafiecaj implikoj, se necese ghis en niaj propraj politikaj strukturoj.
Internacie ni kunlaboros police por malkovri planatajn atencojn kaj observadi suspektatojn.

SED POR DEPRENI DE TERORISMO SIAN GRUNDON EN LONGA PERSPEKTIVO,
ek de nun, kun chiuj niaj politikaj kaj financaj, personaraj kaj moralaj fortoj,
ni engaghas nin por la sociaj kaj demokratiaj rajtoj en nia lando kaj sur la tuta tero.
Ni postulas la protekton de malplimultoj en kiu ajn lando.
Al chiu shtato ni apelacias, ke oni zorgu pri la observo de homaj rajtoj,
tuj abolu tortur-kelojn, luktu kontrau sklava kaj infana laboro kaj garantiu virinajn rajton.
Chi postulo ne estas diskutebla.

Krome mi ordonas tujan haltigon de chia LIVERADO DE ARMILOJ el nia lando al regionoj de milito kaj krizo.
Ni ne povas pli longe toleri,
ke ni mem liveru armilojn al homoj, kiuj poste eventuale endangherigos la mondan pacon kiel teroristoj.
La aliajn landojn, kiuj produktas au liveras armilojn, mi invitas age same.

Simile, chiuj landoj senprokraste starigos programojn por deklari MALSATON KAJ MIZERON la MALAMIKO NUMERO UNU de la homaro.
Dum chiutage mortas pro malsato au subnutro 24 000 homoj, ne eblas paco.
La bazaj rajtoj je nutro, logho, eduko kaj medicina baza prizorgo estu tuj garantiataj.
Chi postulo ne estas diskutebla, char ghi jam estas la deklarita volo de la monda komunumo en la Charto de Unuighintaj Nacioj.
Por tiu celo ni disponigas dek miliardojn da dolaroj,
kaj ni invitas chiujn milionulojn kaj miliardulojn en la mondo disponigi por la sama celo almenau la dekonon de siaj posedajhoj.
Sed ech nur unu procento de la enspezoj de la plej richaj 200 personoj sur la tero havigus 8 miliardojn da dolaroj,
kiuj uzeblus por la nomita celo.
Tiel, tre baldau ni notus videblajn sukcesojn.

Pliaj programoj tiukampe enhavus batalon kontrau AIDOSO, precipe en Afriko;
reintegradon de iamaj infanoj-soldatoj kaj infanoj-prostituitoj,
batalon kontrau misuzo de narkotajhoj kaj komercado de narkotajhoj,
helpon por kultivantoj de kokao kaj opio por transiri al produktado de bazaj nutrajhoj,
plibonigon de la infra-strukturo kaj edukado en chiuj mizer-kvartaloj.

Kromajn 5 miliardojn ni investos en RENKONTO-CENTROJ
por malsamaj nacioj, rasoj, religioj kaj kulturoj sub la signo de kulturo de paco, pac-esploro kaj pac-laboro.
Chiujn religiojn ni invitas doni dekonon de siaj rimedoj por interreligia komprenigho kaj renkonto.
Ni postulas ke ili estu inter si toleremaj kaj pacemaj.
Ni apelacias ankau al chiuj ne-religiaj homoj, ke ili konsciighu pri la bazaj valoroj de homeco kaj laboru favore al ili.

PASINTECE, NI FARIS MILITOJN au forigis registarojn, kiuj ne plachis al ni.
Je tiu loko, en la nomo de la usona popolo, mi volas esprimi mian profundan bedauron al chiuj koncernaj homoj kaj popoloj.
Estis ja ankau unu 11a de septembro, tiu de la jaro 1973,
kiam, helpe de nia Sekreta Servo, en CHILIO ni renversis la registaron de Allende -
prezidanto, kiu chiutage disdonigis duonan litron da lakto al chiu infano.
Ni bedauras, ke en la landoj de Suda Ameriko ni apogis reghimojn, kiuj subjugis sian landon per diktatoreco kaj torturo.
Tio ne estas inda je humaneca monda potenco.

Ni bedauras, ke en la nomo de libereco, ni senfoliigis VJENAMION kaj mortigis centmilojn da homoj.
Mi pardonpetas ankau che la IRAKA POPOLO pro la milionoj da viktimoj, precipe da infanoj,
kiuj mortis sekve de la golfa milito pro subnutro kaj misformighoj pro la urania municio kiun ni uzis.
Hodiau, sciante kion senkulpaj viktimoj devas suferi, ni promesas,
ke neniam plu ni konsideros homajn vivojn "flankaj difektoj" - kolateralaj damaghoj.
Chiu vivo estas senfine valora.

Sed ANKAU CHIU ALIA VIVO SUR TIU TERO ESTAS VALORA KAJ PROTEKTINDA.
Tial kiel nacio ni ne pli longe kontraustaros la protokolon de Kyoto por protekti la mondan klimaton,
sed antauenigos alternativajn energiojn, draste reduktos la emisiojn de nocaj substancoj,
kaj helpos al la malrichaj landoj trovi pli inteligentajn solvojn  por ilia energio-produktado ol tiu praktikata de ni.
En tiu kunteksto, la tuja chesigo de atoma energio urghe necesas,
ne laste pro tio ke atomcentraloj povas farighi celtabuloj por terorismaj atakoj.
Sed ni ankau helpos bori akvon en la dezerto, apogi sun- kaj vento-energion,
kaj tutmonde subtenos plantadon de arboj.
Por tio ni donos kromajn 5 miliardojn,
kiuj servos al la monda paco pli ol la mobilizo kaj aktivigo de grandegaj armeoj kaj detru-armiloj.

Plu, mi deklaras hodiau: Ni rezignos chian PRETENDON DE HEGEMONIO.
Mi havas revon: la revon de mondo, en kiu libero kaj rajtoj estos la libero kaj rajtoj ne nur de la potencaj kaj richaj.
Kune kun chiuj homoj, organizoj kaj registaroj,
kiuj volas labori por pli bona ESTONTECO DE NIAJ INFANOJ,
ni utiligas la historian horon, por ke realighu plejeble granda bonfarto, justeco, paco, kaj per tio, sekureco.
La usona popolo komisiis al mi autoritaton por fari ampleksajn decidojn.
Pro respondeco antau Dio, antau mia popolo kaj antau la estonteco de niaj infanoj, mi decidis radikale shanghi nian kurson.
Ni estas nur homoj kaj ni ne sukcesos ekstermi chion malbonan en la mondo.
Sed mi havas vizion, kiun mi sekvos.
Kaj mi vokas al chiuj homoj de bona volo:
HELPU MIN FORMI PLI BONAN MONDON.
NI POVAS FARI NUR TION, KIO EBLAS AL HOMOJ,
SED TION NI POVAS KAJ VOLAS FARI!
Dio benu nin!

<Facile la leganto rimarkos, ke tiu parolado restis neeldirita.
Domaghe! Verkis ghin en germana lingvo Dagmar Hoffmann, Heidenheimer Friedensgruppe>

Atentu ankau la artikolon: Chu justa milito?